ДӨРГӨН СУМЫН ШИНЭ СОЁЛЫН ТӨВИЙН НЭЭЛТЭНД ЗОРИУЛСАН ТОГЛОЛТ ЗОХИОН БАЙГУУЛАГДЛАА
Дөргөн сумын шинэ Соёлын төвийн нээлтэнд зориулсан "Алтан тайзны мялаалга" тоглолт 2019 оны 10 дугаар сарын 31-ний өдөр зохион байгуулагдаж, тоглолтонд нутгийн авъяаслаг хүүхэд багачууд, залуучууд, ахмад үеийн төлөөлөл, Соёлын төвийн ажилтнууд, Ховд аймгийн ХДТ-ын уран бүтээлчид оролцлоо.
Тоглолтыг үзэж сонирхохоор нутгийн иргэд хөдөлмөрчид, сумын орон нутгийн удирдлагууд болон УИХ-ын гишүүн Б.Пүрэвдорж хүрэлцэн ирсэн юм. Тоглолт амжилттай зохион байгуулагдаж дууссаны дараа шинэ Соёлын төв ашиглалтанд орж нээлтээ хийсэнд баяр хүргэж УИХ-ын гишүүн Б.Пүрэвдорж, сумын ИТХ-ын дарга Н.Базаррагчаа, Засаг дарга Т.Заяа нар үг хэлж, шинэ Соёлын төвийг мялаалаа.
Энэхүү шинэ бүтээн байгуулалтын ажил нь Дөргөн сумын түүхэнд тэмдэглэгдэх нэгэн баярт явдал болж байгаа ба УИХ-ын гишүүн Б.Пүрэвдоржийн сонгогдсон тойрогтоо хийсэн томоохон бүтээн байгуулалтын ажлын нэг нь юм. Энэхүү ажлыг санаачлан улсын төсөвт 1,2 тэрбум төгрөг суулган бодит ажил болгосонд талархаж Дөргөн сумын Соёлын төвийн хамт олон УИХ-ын гишүүн Б.Пүрэвдоржид хүндэтгэл үзүүллээ.
Соёлын төв нээлтээ хийснээс эхлэн бүтээн байгуулалтыг дэмжиж, баяр хүргэн, дотоод тохижилтонд зориулж Дөргөн сумын төрийн болон төрийн бус байгууллага, айл өрх, Соёлын төвийн ажилтнуудын ах дүү, ангийн найз нөхөд, урилгаар оролцогчид сэтгэлийн өргөл өргөсөөр байгаад Соёлын төвийн хамт олон баярлаж талархаж байгаагаа илэрхийлсэн юм.
